Kano: CDA Ta Raba Tan 2.85 Na Ingantattun Iri

Daga Khadijah Aliyu 

Cibiyar bincike kan inganta noma a yankunan da ke da ƙarancin ruwa ta Jami’ar Bayero Kano(CDA), ta raba tan 2.85 na ingantattun iri ga manoma daga ƙauyuka 22 da wasu biyar, domin ƙara yawan amfanin gona da inganta wadatar abinci a Arewacin Najeriya.

An yi rabon ne a taron masana da manoma da masu zuba jari karo na 4 da aka gudanar a Jami’ar Bayero.

Irin da aka raba sun haɗa da wake, masara, gero, dawa, waken soya da shinkafa. Ƙananan ma’aikata ma sun amfana domin inganta samar da abinci a gidajensu.

Mataimakin Shugaban Jami’ar, Farfesa Haruna Musa, ya ce taron na haɗa bincike da aikace-aikacen noma domin inganta samar da abinci.

Daraktan CDA, Farfesa Sanusi Gaya Mohammed, ya ce shirin na taimaka wa manoma wajen ƙara yawan amfanin gona da jure sauyin yanayi.

Manoma sun nuna godiya, suna cewa tallafin ya taimaka wajen inganta noma da rayuwarsu.

An kuma gudanar da baje kolin sabbin fasahohin noma tare da halartar hukumomi da kamfanoni daban-daban.