Rukuni na Farko na Alhazan Jihar Kwara Ya Isa Kasar Saudiyya

Daga Ali Muhammad Rabi’u

Rukuni na farko na Alhazan Jihar Kwara su 374 ya sauka ƙasar Saudiyya domin gudanar da aikin Hajjin shekarar 2026.

Ɗaya daga cikin jami’an Hukumar Jin Dadin Alhazai ta Jihar Kwara, Alhaji Mahmud Bube, tare da jami’an Hukumar Alhazai ta Kasa NAHCON su 3 ne suka jagoranci Alhazan da aka ɗauka ta jirgin MaxAir, inda suka tashi daga Filin Jirgin Sama na Babatunde Idi-Agbon da ke Ilorin da misalin ƙarfe 3 na rana.

Da yake zantawa da manema labarai a filin jirgin saman, Shugaban ukumar Jin Daɗin Alhazai ta Jihar Kwara, Alhaji AbdulKadri Abdulsalam, ya shawarci Alhazan da su kasance masu bin doka da oda yayin zamansu a Saudiyya.

Alhaji Abdulsalam ya kuma yaba wa Gwamna AbdulRahman AbdulRazaq bisa goyon bayan da yake ci gaba da bayarwa, wanda ya tabbatar da fara aikin cikin nasara.

A nasa jawabin, Amirul-Hajj kuma Etsu Tsaragi, Alhaji Aliyu Abdullahi Kpotwa, ya buƙaci Alhazan da su kasance masu ladabi, su kuma bi ƙa’idoji yadda ya kamata, tare da mai da hankali kan muhimmancin ibadar Hajji.