Tsoffin Gwamnonin Jigawa Sun Yaba Wa Nasarorin Gwamna Namadi

Daga Usman Muhammad Zaria 

Tsoffin Gwamnonin Jihar Jigawa sun yaba wa Gwamna Umar Namadi bisa nasarorin da ya samu wajen aiwatar da ayyukan raya ƙasa da inganta rayuwar al’umma cikin ƙasa da shekaru huɗu da fara mulkinsa.

Tsofaffin Gwamnonin, Barista Ali Sa’adu Birnin Kudu da Sanata Ibrahim Saminu Turaki, sun bayyana hakan ne a lokacin ƙaddamar da kwamitin yaƙin neman zaɓen Jigawa na 2027 a Gidan Gwamnatin Jihar da ke Dutse, inda aka nuna goyon baya ga Shugaba Bola Ahmed Tinubu da Gwamna Namadi gabanin zaɓe mai zuwa.

Tsoffin gwamnonin sun bayyana kwarin gwiwar cewa nasarorin gwamnatin Namadi za su zama babban makamin yaƙin neman zaɓe, tare da ƙara wa jam’iyyar APC damar samun nasara a zaɓen 2027.

Barista Ali Sa’adu Birnin Kudu ya bayyana Gwamna Namadi a matsayin shugaba mai gaskiya da riƙon amana, yana mai cewa ayyukan gwamnatinsa ba su bar wani gurbi na suka ba.

Ya ce gwamnan ya nuna gaskiya wajen tafiyar da kuɗaɗen gwamnati, yana mai cewa yawancin masu sukar sa suna yin hakan ne saboda hassada da bambancin siyasa.

A nasa ɓangaren, Sanata Ibrahim Saminu Turaki ya bayyana Namadi a matsayin shugaba mai adalci, tsayayyen ra’ayi da tausayi, wanda ya samu gagarumar nasara a fannin samar da ababen more rayuwa da ilimi.

Ya yaba musamman kan ayyukan hanyoyi da gwamnatin ke gudanarwa a faɗin jihar, da kuma ɗaukar dubban malamai aiki, yana mai cewa ba a taɓa samun irin wannan ɗaukar malamai ba tun bayan barinsa mulki.

Turaki ya ce a baya wasu makarantu sun fuskanci barazanar rufewa saboda ƙarancin malamai, sai gashi gwamnatin mai ci yanzu ta magance matsalar ta hanyar ɗaukar malamai da dama aiki.

Fassara: Safiyah Abdulkadir