Gwamnatin Jigawa Ta Amince Da Gudanar Da Ayyukan Kiwon Lafiya Na Miliyoyin Naira

Daga Usman Muhammad Zaria

Gwamnatin Jihar Jigawa ta amince da bayar da kwangilolin ayyukan kiwon lafiya da samar da abinci mai gina jiki, da suka haura naira miliyan 550 a faɗin jihar.

Kwamishinan Yaɗa Labarai na jihar, Alhaji Sagir Musa Ahmed, ya bayyana hakan jim kaɗan bayan taron Majalisar Zartarwar Jihar da aka gudanar a Fadar Gwamnati da ke Dutse.

Ya ce cikin ayyukan akwai  farfaɗowa da inganta Cibiyar Kiwon Lafiya ta Matakin Farko da ke Samamiya, a Ƙaramar Hukumar Birnin Kudu, domin faɗaɗa damar samun kiwon lafiya da inganta ayyukan kula da lafiyar mata da yara.

Kwamishinan ya kuma ce majalisar ta amince da sayen katan 2,155 na abincin jinya da ake amfani da shi kai tsaye, wato RUTF, domin rarrabawa ga cibiyoyin kula da lalurar matsananciyar rashin abinci mai gina jiki a ƙananan hukumomi 27 na jihar.

Sagir Musa Ahmed ya ce amincewa da ayyukan na nuna ƙudirin gwamnatin jihar na ƙarfafa kiwon lafiya na matakin farko da kuma yaƙi da matsanancin rashin abinci mai gina jiki tsakanin jarirai da sauran yara masu rauni.

Fassara: Safiyah Abdulkadir