Gwamnatin Nasarawa ta Nada Sabon Osu Ajiri na Masarautar Udege

Daga Aliyu Muraki 

Gwamnatin Jihar Nasarawa ta amince da nadin Suleiman Ahmed Eko a matsayin sabon Osu Ajiri na masarautar Udege da ke ƙaramar hukumar Nasarawa ta jihar.

Kwamishinan Kananan Hukumomi, Harkokin Masarautu da cigaban Al’umma na jihar, Alhaji Aminu Mu’azu Maifata ne ya bayyana hakan yayin ganawa da manema labarai a Lafia, babban birnin jihar.

Ya ce sabon basaraken zai fara aiki ne nan take, yana mai taya shi murna da kuma masa fatan alheri bisa nauyin da aka damka masa.

Alhaji Aminu Mu’azu Maifata ya kuma bayyana cewa an gudanar da nadin ne bayan tattaunawa da Majalisar Sarakunan Gargajiya ta jihar.

Ya ƙara da cewa Suleiman Ahmed Eko ya gaji marigayi Alhaji Halilu Bala-Usman tsohon mataimakin gwamnan tsohuwar Jihar Plateau, wanda ya rasu a ranar Lahadi, 25 ga watan Mayun 2025.

An haifi sabon basaraken  ne  ranar 2 ga watan Yunin 1972, ya kuma kammala karatunsa ne a Kwalejin Kimiyya da Fasaha ta Tarayya da ke Nasarawa. Haka kuma yana da aure tare da ’ya’ya.