Ilimi

NAHCON Ta Bada Kujerar Hajji Ga Wacce Ta Lashe Gasar Karatun Alkur’ani Ta Duniya

Published

2 months ago

March 9, 2024

Hukumar Kula da Aikin Hajji ta Kasa NAHCON, ta bai wa Hajara Ibrahim Dan’azumi, wadda ta lashe gasar kur’ani ta duniya da aka kammala a kasar Jordan kujerar aikin Hajjin bana.

Hakan na kunshe ne cikin wata sanarwa mataimakiyar daraktan hulda da jama’a na hukumar Fatima Sanda Usara, ta raba wa manema labarai.

Hajiya Fatima Usara ta kara da cewa Shugaban Hukumar, Malam Jalal Ahmad Arabi, ya kuma taya Hajara Dan’azumi murna bisa wannan nasara da ta samu.

An gudanar da gasar tsakanin ranakun 17 zuwa 22 ga Fabrairu 2024, a kasar Jordan.

Ma’aikatar kula da harkokin addinin musulunci ta kasar Jordan ce ke shirya gasar a duk shekara, wanda wannan shi ne karo na 18.

Hajara Dan’azumi, ‘yar shekara 19 daga makarantar Abubakar Siddiq Community Islamic School, Gombe, daliba ce kuma a jami’ar jihar Gombe, ta wakilci Najeriya a bangaren Hizfi 60 da Tajwidi. Ta samu kashi 99.5 cikin 100, wanda ya bata damar lashe gasar cikin sauran ‘yan takara da suka fito daga kasashe 39.

A cikin sakon taya murna ga Gwamnan Jihar Gombe, Mai Girma Alhaji Inuwa Yahaya, Malam Jalal Arabi ya bayyana jin dadinsa da yadda Hajara Ibrahim Dan’azumi ta nuna kwazo.

Shugaban Hukumar NAHCON wanda mataimakinsa Usman Nuraini ya wakilta a wata liyafa ta musamman da gwamnatin jihar ta shirya, ya sanar da baiwa Malama Hajara kyautar kujerar Hajji ta 2024.

A yayin bikin, Gwamna Inuwa Yahaya ya baiwa Hajara kyautar kyautar Naira miliyan biyar. Bugu da kari, gwamnan ya ba ta cikakken tallafin karatu tun daga digiri na farko zuwa na uku, sannan kuma an baiwa makarantar Islamiyyar da Hajara ke karatu kyautar Naira miliyan biyar “domin inganta ayyukanta da samar da i ingantaccen horar da dalibai”.

“Karramawar da Shugaban Hukumar NAHCON ya yi wa Hajara ta yi daidai da al’adar sa na tukuicin kwazon aiki da kwazon da ya yi a fadin hukumar. Yakin Malam Arabi ne cewa amincewa da irin wadannan nasarorin zai sa wasu su sake yin irin wannan aikin yayin da suke dauke da wutar da ke aiwatar da kyawawan dabi’u na addinin Musulunci,” inji Hajiya Usara