Tinubu: Sabbin Dokokin Haraji Za Su Kawo Wadata Yayinda Tsofaffi Suka Talauta ‘Yan Najeriya

Shugaban ƙasa Bola Ahmed Tinubu ya ce tsofaffin dokokin haraji na zamanin mulkin mallaka sun talauta ‘yan Najeriya, yana mai cewa sabbin gyare-gyaren da gwamnatinsa ta kawo za su samar da dama da wadata ga al’umma.

Ya bayyana haka ne a Abuja yayin kaddamar da sabon hedikwatar Hukumar Haraji ta ƙasa, inda ya jaddada cewa tsarin harajin da aka ƙirƙira yanzu ya fi karkata ga jama’a da kuma jawo zuba jari.

Shugaban ya ce sabbin dokokin, da aka fara aiwatar da su a watan Janairu, za su gyara matsalolin tsohon tsarin tare da sanya tattalin arzikin ƙasar ya zama mai gasa a duniya.

A wajen taron, shugaban majalisar dattawa Godswill Akpabio da kakakin majalisar wakilai Tajudeen Abbas sun yabawa gyare-gyaren, suna cewa sun fara haifar da sakamako mai kyau.

Shugaban ya kuma buƙaci hukumar haraji ta kasance mai gaskiya da inganci wajen aikinta, tare da gina amincewar jama’a, yana mai cewa hakan ne zai tabbatar da ci gaban tattalin arzikin ƙasa.

Bello Wakili Abuja