Allah Ya Jikan Jarman Kauru Da Ke Jihar Kaduna

Mun sami labarin rasuwar tsohon Kwamishinan Ilimi na Jihar Kaduna, Malam Suleiman Lawal Jarman Kauru.

Malam Suleiman Lawal, mai shekaru 78, ya rasu a daren Asabar, 3 ga Janairu, 2026, bayan fama da doguwar jinya.

Kafin rasuwarsa, ya kasance Sakataren Kwamitin Aiki da cikawa (Task Force Committee) kan gina Asibitin Koyarwa na Jami’ar Ahmadu Bello (ABUTH), Shika, Zariya, da kuma Cibiyar kula da lafiyar Ido ta Ƙasa (National Eye Center), Kaduna.

A baya, ya riƙe muhimman mukamai da dama, ciki har da shugaban Kwalejin Fasaha ta Jihar Kaduna dake Zariya (wacce yanzu ake kira Nuhu Bamalli Polytechnic, Zariya), Kwamishinan Tarayya a Hukumar kula da da’ar Ma’aikata Federal Character Commission mai wakiltar Jihar Kaduna, da kuma Kwamishinan Ilimi na Jihar Kaduna, da sauransu.

Marigayi Jarman Kauru ya rasu ya bar mata biyu, ’ya’ya 14, da jikoki da dama.

Daga cikin ’ya’yansa akwai Alhaji Nuraddeen Suleiman Lawal Mayana Kauru, Sakataren Ilimi (Academic Secretary) na kwalejin kimiyya da fasaha ta Nuhu Bamalli, Zariya.

An gudanar da sallar jana’izan sa a Filin Eid na Mallawa da ke Ban Zazzau, Zariya, da misalin karfe 1:30 na rana, Lahadi, 4 ga Janairu, 2026.

Allah Maɗaukakin Sarki Ya gafarta masa kurakuransa, Ya kuma ba shi Aljannar Firdausi.

Yusuf Zubairu