PDP Ta Amince Da Ombugadu A Matsayin Ɗan Takarar Gwamnan Nasarawa Na 2027

Daga Aliyu Muraki

Jam’iyyar PDP a Jihar Nasarawa ta ayyana Dakta Emmanuel Ombugadu a matsayin ɗan takararta na gwamna a zaɓen 2027.

Shugaban kwamitin zaɓen fidda gwani na jam’iyyar, Abdulmaleek Danga, ya bayyana hakan a Lafia, yana mai cewa Ombugadu ya samu tikitin ne ta hanyar maslaha.

Ya ce tsarin ya kasance cikin lumana, gaskiya da adalci, tare da yabawa mambobi da masu ruwa da tsaki bisa nuna haɗin kai da jajircewa.

A jawabinsa, Dakta Ombugadu ya gode wa mambobi da shugabannin jam’iyyar bisa amincewa da shi, tare da fatan samun nasara.

Ya kuma sake gabatar da abokin takararsa na 2023, Yahaya Ohinoyi, a matsayin mataimakinsa na zaɓen 2027, tare da kira ga magoya bayan PDP su ci gaba da haɗin kai domin samun nasara a babban zaɓen mai zuwa.