An Bayyana Rasuwar Jalul Baba Ahmed A Matsayin Babban Rashi

An bayyana rasuwar marigayi Barrista Jalul Baba Ahmed a matsayin babban rashi ga iyalansa da ma’aikatan Radio Nigeria Kaduna da kuma abokan arziki da masoyansa.

Shugaban Hukumar Ilimin Sakandare ta jihar Neja, Alhaji Abdulkadir Shehu Nafuntua, ne ya bayyana haka cikin saƙon ta’aziyyar da ya aikewa Radio Nigeria Minna.

Ya ce rasuwar marigayin abin takaici ne matuƙa, yana mai cewa zai yi wuya a samu gurbin da zai cike gibi da ya bari saboda ƙwarewarsa da jajircewarsa wajen aiki.

Alhaji Abdulkadir Shehu Nafuntua ya yabawa irin yadda marigayin ke fassara labarai da gabatar da shirye-shirye da sharhi cikin kwarewa da nagarta.

Ya miƙa ta’aziyyarsa ga iyalan marigayin da ma’aikatan Radio Nigeria Kaduna tare da addu’ar Allah ya gafarta masa kura-kuransa ya kuma sanya shi a Aljannatul Firdausi.

Aliyu Lawal/Minna