Gwamna Namadi Ya Bayyana Alhininsa Bisa Rasuwar Tsohon Dan Majalisa Abba Anas Adamu

Daga Usman Muhammad Zaria

Gwamnan Jihar Jigawa, Umar Namadi, ya bayyana matukar alhininsa kan rasuwar tsohon dan majalisar wakilai ta tarayya, Alhaji Abba Anas Adamu, inda ya ce rasuwarsa babban rashi ne ga Jihar Jigawa da ma kasa baki daya.

Gwamnan ya bayyana hakan ne jim kadan bayan halartar sallar jana’izar marigayin da aka gudanar a Kano a yau Talata, 12 ga watan Mayun 2026, inda ya jajantawa iyalai, da abokan arziki bisa wannan babban rashi, tare da yi masa addu’ar samun rahama.

Gwamna Namadi ya bayyana marigayi Abba Anas Adamu a matsayin jajirtacce, wanda ya sadaukar da wani bangare mai muhimmanci na rayuwarsa wajen yi wa al’ummarsa hidima.

Ya kuma ce marigayin ya taka muhimmiyar rawa a fannoni daban-daban na hidimar jama’a, ciki har da kasancewarsa tsohon dan majalisar wakilai ta tarayya, tsohon shugaban karamar hukumar Guri, tsohon kwamishina a Jihar Jigawa, sannan kuma gogaggen malami.

A cewarsa, za a rika tunawa da marigayin musamman saboda tawali’unsa, da jajircewarsa wajen tabbatar da dimokuradiyya, da gudummawar da ya bayar wajen bunkasa harkokin siyasar Jihar Jigawa.

Gwamna Namadi ya roki Allah Madaukakin Sarki da Ya gafarta wa marigayin kura-kuransa, Ya sanya shi a Aljannatul Firdaus, sannan Ya bai wa iyalansa, da abokan arziki, da ma abokan siyasarsa da al’ummar Jihar Jigawa juriyar jure wannan babban rashi.