NSCDC Ta Gargadi Masu Laifi Da Barayin Kadarori A Kwara

Hukumar tsaro ta NSCDC a jihar Kwara ta gargadi masu aikata laifuka da masu lalata kadarorin gwamnati da su kauce wa jihar.

Sabon kwamandan hukumar, Abbas Mohammed, ya bayyana haka a cikin wani saƙo da ya aikewa al’ummar jihar, inda ya jaddada kudurin hukumar na kare rayuka da dukiyoyi da kuma kiyaye muhimman kadarorin ƙasa.

Ya ce rundunar za ta ƙara ƙaimi wajen amfani da hanyoyin tattara bayanan sirri domin yaƙi da dukkan nau’o’in laifuka, tare da ɗaukar matakan rigakafi kafin aukuwar su.

Kwamandan ya kuma nuna cewa jihar Kwara ba za ta zama mafakar masu laifi ba, yana mai cewa a shirye suke su yi amfani da dukkan dabarun tsaro domin tabbatar da zaman lafiya.

Haka kuma, ya buƙaci al’umma da su kasance cikin shiri tare da bai wa jami’an tsaro sahihan bayanai a kan lokaci domin taimakawa yaƙi da aikata laifuka.

Muhammadu Rabi’u/Kwara