Gwamnan Kwara ya ziyarci sojojin da suka jikkata, ya ba da tallafi ga iyalansu

Gwamnan jihar Kwara, AbdulRahman AbdulRazaq, ya kai ziyara ga sojojin da suka jikkata a wani aikin yaki da ta’addanci a Kaiama, tare da bayar da tallafin kuɗi ga iyalansu.

Gwamnan ya kuma bayyana cewa an kashe wasu ‘yan ta’adda a arangamar, inda sojoji uku suka rasa rayukansu yayin fafatawar.

Ya sanar da bayar da tallafin Naira miliyan 20 ga iyalan kowane soja da ya rasa ransa, sannan kuma ya bayar da Naira miliyan 5 ga kowane soja da ya jikkata.

AbdulRazaq ya bayyana godiyarsa ga jarumtar da jami’an tsaro ke yi wajen kare ƙasa, yana mai cewa sadaukarwarsu ba ta da misaltuwa.

Ya kuma yaba wa asibitin koyarwa na Jami’ar Kwara kan ingancin kulawar da ake bai wa sojojin da suka jikkata.

A ƙarshe, gwamnan ya jaddada goyon bayansa ga rundunar tsaro, yana mai cewa gwamnati za ta ci gaba da tallafa musu wajen yaki da rashin tsaro.

Muhammad Rabiu/Ilorin