Hajjin 2026: Jigawa ta Fara Tantance Lafiyar Maniyyata

Daga Usman Muhammad Zaria

Hukumar Jin Daɗin Alhazai ta Jihar Jigawa ta bayyana cewa  maniyyata masu cikakkiyar lafiya ne kadai za a lamincewa zuwa aikin Hajjin 2026.

Darakta Janar na hukumar, Alhaji Ahmed Umar Labbo ne ya bayyana hakan a Babban Asibitin Gwamnati na Hadejia yayin ƙaddamar da shirin tantance lafiyar maniyyata aikin Hajjin 2026 a hukumance.

Ya ƙara da cewa shirin na daga cikin shirye-shiryen da hukumar ke yi domin tabbatar da lafiyar  Alhazan jihar.

Alhaji Ahmed Umar Labbo ya jaddada cewa hukumar ta jajirce wajen bin ƙa’idojin Saudiyya, waɗanda suka tanadi cewa mutanen da ke da cikakkiyar lafiya ne kaɗai za su gudanar da aikin Hajjin.

Ya kuma bayyana cewa za a gudanar da tantancewar cikin adalci da gaskiya domin cimma manufofin da aka sanya a gaba.

Wasu daga cikin maniyyatan sun yabawa hukumar bisa  yadda take gudanar da shirin.

Rediyon Nijeriya ya ruwaito cewa Darakta Janar ɗin ya samu rakiyar Daraktan Ayyuka, Alhaji Muhammad Garba.