Kaduna: Gwamnati Ta Karyata Rahoton ‘Sahara Reporters’ Kan Matsalar Tsaro

Daga Abdullahi Shettima

Gwamnatin Jihar Kaduna ta nesanta kanta daga rahoton da jaridar Sahara Reporters ta wallafa, wanda ya zargi gwamnatin jihar da gaza wajen magance matsalolin tsaro.

A cikin wata sanarwa da ta fitar, hukumar gwamnatin ta bayyana labarin a matsayin naɗaɗɗen rahoto marar tushe, wanda bai nuna ainihin matakan da gwamnati ke ɗauka ba domin inganta tsaro a sassan jihar.

Sanarwar ta ce gwamnatin Kaduna, ƙarƙashin jagorancin Gwamna Uba Sani, ta zuba makudan kudade a bangaren tsaro, ciki har da tallafa wa hukumomin tsaro da kayan aiki, horaswa, da kuma aiwatar da sabbin dabarun kawar da barazana a yankunan da ke fama da hare-hare.

Gwamnati ta ce makonnin baya an samu raguwar hare-hare a wasu yankuna sakamakon tsauraran matakan da jami’an tsaro ke dauka tare da hadin gwiwar al’umma da hukumomin tsaro na tarayya.

Ta kuma yi kira ga kafafen yada labarai da su tabbatar da bincike mai zurfi kafin wallafa bayanai masu nasaba da tsaro, tana mai cewa irin rahotannin da ba su da sahihanci na iya tayar da hankalin jama’a ko haifar da rudani.

Gwamnatin Kaduna ta sake jaddada kudirinta na ci gaba da aiki tare da hukumomin tsaro domin kare rayuka da dukiyoyin al’umma, tare da tabbatar da cewa tsaro ya ci gaba da zama babbar manhaja a shirin mulkinta.

Karshe.