Jigawa Ta Kulla Yarjejeniya da Cibiyar AfricaRice Don Inganta Noman Shinkafa

Daga Usman Muhammad Zaria 

Gwamna Umar Namadi ya kulla yarjejeniya da Cibiyar Binciken Shinkafa ta Afrika (AfricaRice) domin hanzarta bunkasa noman shinkafa da karfafa samar da abinci a jihar Jigawa.

An rattaba hannu kan takardar yarjejeniyar ne yayin wani babban taro da aka gudanar a Bouaké na kasar Côte d’Ivoire.

Daraktan Hukumar Sauya Fasalin Aikin Noma ta Jigawa (JATA), Dr. Saifullahi Umar, da Daraktan AfricaRice, Dr. Baboucarr Manneh, ne suka sanya hannu kan yarjejeniyar.

A lokacin bikin rattaba hannun, Gwamna Namadi ya sake jaddada kudirin gwamnatinsa na gina tsarin noman shinkafa na zamani a jihar.

“Wannan hadin gwiwa da AfricaRice shaida ce ta jajircewarmu wajen farfado da harkar noma da bunkasar tattalin arziki. Mun kuduri aniyar samar wa manomanmu kayan aiki da ilimi da za su tabbatar da Jigawa ta zama cibiyar noman shinkafa,” in ji shi.

Daraktan JATA, Dr. Saifullahi Umar, ya bayyana yarjejeniyar a matsayin matakin sauyi mai ma’ana ga fannin noma a Jigawa, yana mai cewa hakan zai  hanzarta canjin jihar zuwa noma na zamani.

Shi ma Daraktan AfricaRice, Dr. Manneh, ya bayyana shirinsu na tallafawa burin jihar ta Jigawa  yana cewa cibiyar za ta gabatar da sabbin dabaru da za su inganta noman shinkafa a matakin kasa.

Hadin gwiwar zai fara ne da zaman tsare-tsare don fitar da muhimman ayyuka da kuma kaddamar da gwaje-gwajen gona a yankunan dabi’un noma daban-daban na jihar.

AfricaRice, wacce aka kafa a 1971 kuma ke da hedikwata a babban birnin Abidjan na kasar Côte d’Ivoire, kungiya ce ta bincike mai yunkurin rage talauci da karfafa samar da abinci a Afrika, ta hanyar ingantaccen bincike kan shinkafa da karfafa hadin gwiwa.