Abdulaziz Yari Zai Raba Tirelar Abinci 358 Ga Mabukata

Tsohon Gwamnan Jihar Zamfara kuma Sanata mai wakiltar Zamfara ta Yamma, Sanata Alhaji Abdulaziz Yari Abubakar na shirin raba tireloli dari uku da hamsin da takwas  na kayan abinci  ga al’ummar jihar.

Shugaban kwamitin yada labarai na kungiyar siyasa ta AA Yari, Alhaji Ibrahim Muhammad Birnin Magaji ya bayyana haka a wata sanarwa da ya raba wa manema labarai a Gusau babban birnin jihar.

Sanarwar ta ce, matakin yunkuri ne  na bai wa al’ummar musulmi damar fara azumin watan Ramadan mai zuwa cikin sauki.

Da yake karbar rahoton mutane dubu dari biyu da hamsin da za su  amfana da tallafin daga kananan hukumomi daban-daban a ranar Lahadi, 3 ga Maris, 2024 a Gusau, kwamirin rabon gado karkashin jagorancin  Lawal Liman,  ya bayyana cewa za a raba Shinkafa, da Siga da Gero  da Masara, a maimakon Masara kadai da aka raba a baya, saboda  muhimmancin watan Ramadan mai alfarma

Ya bayyana cewa sama da kashi casa’in da takwas na kayayyakin an yi nasarar jigilar su zuwa kananan hukumomi daban-daban na jihar, don saukakawa wadanda suka ci gajiyar tallafin.

Shugaban ya ci gaba da cewa  mabukata ne kadai za su gajiyartallafin, wadanda suka hada da marayu da zawarawa.

Ya kara da cewa, za a fara rabon ne  kafin watan Ramadan, don haka ya bukaci jama’a da su ci gaba da yi wa tsohon Gwamna, jihar da kasa baki daya addu’a.

SANI DUTSINMA