Jigawa: An Tsaurara Tsaro a Wuraren Karɓar Kayayyakin Alhazai a Dutse

Daga Usman Muhammad Zaria

Hukumar Jin Daɗin Alhazai ta Jihar Jigawa ta ce ta tura jami’an tsaro a wuraren karɓar kayayyakin Alhazai da ke Dutse.

Babban Daraktan Hukumar, Alhaji Ahmed Umar Labbo, ya bayyana hakan a wata hira da wakilin RediyonNajeriya, Usman Mohammed Zaria, a birnin Makkah.

Ya ce jirgi na farko ya isa filin jirgin sama na Dutse tare da kayan Alhazai.

A cewarsa, jami’an tsaro da aka tura sun haɗa da ‘yan sanda, jami’an shige da fice, kwastam, hukumar tsaro ta farin kaya (NSCDC), da kuma ‘yan sa-kai, waɗanda suke a muhimman wurare domin tabbatar da ingantacciyar kulawa da kayayyakin Alhazai.

Alhaji Ahmed Umar Labbo ya ƙara da cewa tawagar hukumar  da jami’an tsaro za su taimaka wajen tabbatar da tsari wajen karɓo kayayyakin Alhazai cikin kwanciyar hankali.

Ya ce wannan tsari da aka shirya na da nufin kare dukiyar Alhazai tare da hana duk wani shige da fice da bai dace ba wurin kayayyakinsu.

Shugaban hukumar ya kuma bayyana cewa an ba Alhazai tambari (tags) domin gano kayayyakinsu a sansanin Alhazai.

Labbo ya kuma yi kira ga Alhazai da su ba da cikakken haɗin kai ga dukkan jami’an tsaro yayin karɓar kayayyakinsu.

Rediyon Najeriya ya ruwaito cewa rukuni na farko na Alhazai 484 sun isa filin jirgin sama na Nuhu Muhammadu Sunusi da ke Dutse, babban birnin jihar, bayan kammala aikin hajjin bana.