Jihar Jigawa Za Ta Yi Aikin Idanu Kyauta ga Alhazai a Makka

Daga Usman Muhammad Zaria

Hukumar Jin Daɗin Alhazan Jihar Jigawa ta sanar da kulla haɗin gwiwa da wata gidauniya da ke Makkah a Ƙasar Saudiyya domin samar da ayyukan kula da idanu kyauta ga Alhazan jihar.

Babban Daraktan Hukumar, Alhaji Ahmed Umar Labbo ne ya bayyana hakan a birnin Makkah na Ƙasar Saudiyya.

Ya jaddada cewa babban burinsa shi ne ci gaba da ƙirƙiro shirye-shirye da tsare-tsaren da za su tallafa wa Alhazai kai tsaye, tare da inganta lafiyarsu a duk tsawon zamansu a ƙasa mai tsarki.

Alhaji Ahmed Umar Labbo ya bayyana cewa wannan haɗin gwiwa wani muhimmin ci gaba ne a ƙoƙarin hukumar na tabbatar da lafiya da walwalar Alhazan jihar.

Babban Daraktan ya ƙara da cewa haɗin gwiwar da aka ƙulla tsakanin hukumar da gidauniyar na da nufin samar da cikakkun ayyukan kula da idanu kyauta, ciki har da tiyatar cire hazo (cataract) da kuma ba da magunguna ga dukkan Alhazan jihar.

Wakilin Rediyon Najeriya ya ruwaito cewa a shekarar 2025, Alhaji Ahmed Umar Labbo ya ƙaddamar da shirin kula da idanu kyauta tare da wani asibiti a Ƙasar Saudiyya domin Alhazan jihar, wanda ya samu gagarumar nasara a birnin Makkah.