APC Ta Sanar da Sakamakon Zaben Fidda Gwani na Sanatoci a Zamfara

Daga Aminu Dalhatu 

Jam’iyyar APC a jihar Zamfara ta sanar da waɗanda suka yi nasara a zaɓen fidda gwani na sanatoci a yankuna uku na jihar, inda ta bayyana cewa an gudanar da zaɓen cikin lumana.

A Zamfara ta Tsakiya, Ikra Aliyu Bilbis ta yi nasara da ƙuri’u 127,686, yayin da a Zamfara ta Yamma Abdulaziz Yari ya lashe zaɓen da ƙuri’u 125,235.

Haka kuma a Zamfara ta Arewa, Sahabi Alhaji Yau ya zama zakara bayan samun ƙuri’u 65,642.

Shugaban kwamitin zaɓen, Farfesa Bala Ishaq, ya ce ba a samu tashin hankali ko wata babbar matsala ba yayin gudanar da zaɓen.

Ya kuma buƙaci dukkan masu ƙorafi su miƙa koke-kokensu ga kwamitin ɗaukaka ƙara na jam’iyyar, wanda zai fara zama daga ranar 28 ga watan Mayun 2026.