Mai Alfarma Sarkin Musulmi Ya Ayyana Yau Litinin A Matsayin 1. Ga Zulhijja

Mai Alfarma Sarkin Musulmi, Muhammad Sa’ad Abubakar, ya ayyana yau Litinin 18 ga watan Mayu, 2026 a matsayin ranar farko ta watan Zulhijja na shekarar Musulunci 1447 bayan Hijira.

Wannan na kunshe ne cikin wata sanarwa da ta bayyana cewa ganin jinjirin wata na kowane wata na taimaka wajen fayyace kalandar Musulunci a cikin shekara, tare da tabbatar da bin tsarin addini yadda ya kamata.

Sanarwar ta kuma ce ganin jinjirin wata na kowane wata na Musulunci na taimakawa wajen tabbatar da sahihancin kalandar Musulunci, tare da ƙara fahimtar al’umma game da yadda ake fara watanni na addini, ciki har da watan Ramadan da sauran watanni na ibada.

Hakan na zuwa ne a daidai lokacin da Musulmi ke shirin shiga muhimman ayyukan ibada na watan Zulhijja.