An Kafa Runduna Ta Musamman Don Dakile Manyan Laifuka a Kano

Daga Abdullahi Jalaluddeen

Kwamishinan ‘Yan Sanda na Jihar Kano, Ibrahim Adamu Bakori, ya kaddamar da wata runduna ta musamman mai suna Violent Crime Response Unit (VCRU) domin karfafa yaki da manyan laifuka da inganta tsaro a jihar.

Ya bayyana wannan mataki a matsayin wani muhimmin ci gaba a kokarin rundunar  na samar da zaman lafiya da kare rayuka da dukiyoyin al’umma.

Bakori ya ce an kafa rundunar ne a ranar 24 ga watan Afrilun 2026, bisa umarnin shugabancin Rundunar ‘Yan Sandan Najeriya domin karfafa aikin leken asiri da inganta ayyukan tsaro.

A cewarsa, VCRU runduna ce ta musamman da aka kirkira domin magance matsalolin fashi da makami, garkuwa da mutane, ‘yan bindiga da sauran manyan laifuka a jihar.

Ya ce an tsara rundunar domin mayar da martani cikin gaggawa ga matsalolin tsaro, tare da dakile ayyukan masu aikata laifuka da tabbatar da bincike mai zurfi.

Kwamishinan ya ce jami’an rundunar an zabo su ne bayan tantancewa tare da ba su horo na musamman kan dabarun aiki, bayanan sirri da kare hakkin dan Adam.

Ya kara da cewa rundunar za ta dogara da bayanan sirri da hadin kan jama’a domin gudanar da ayyukanta yadda ya kamata.

Haka kuma, rundunar ta kaddamar da Kwamitin Sa Ido na Fararen Hula domin tabbatar da gaskiya, rikon amana da kara amincewar jama’a ga ayyukan tsaro.