Gwamnatin Zamfara ta ba da umarnin kakaba doka kan masu karya ka’idojin hanya

Gwamnatin jihar Zamfara ta umurci hukumomin tsaro da su tsaurara matakai kan masu karya dokokin hanya a faɗin jihar.

Sakataren gwamnatin jihar, Abubakar Mohammad Nakwada, ne ya bayar da umarnin yayin karɓar rahoto kan laifukan karya dokokin hanya a Gusau.

Ya ce halayen wasu masu amfani da hanya na ci gaba da jefa rayukan jama’a cikin haɗari, don haka ya umurci jami’an tsaro su kamo tare da gurfanar da masu laifi ba tare da nuna bambanci ba.

Haka kuma, ya gargadi jami’an da su guji karɓar cin hanci yayin aiwatar da wannan aiki, yana mai cewa duk wanda aka samu da sakaci ko karya doka ba za a lamunta masa ba.

Gwamnatin ta kuma buƙaci hukumomin da abin ya shafa su ƙara wayar da kan jama’a kan muhimmancin bin dokokin hanya domin rage yawan haɗurran mota.

Daga cikin shawarwarin kwamitin da aka kafa har da samar da rundunar haɗin gwiwa tsakanin hukumomin tsaro domin aiki tare da kotun laifukan hanya ta jihar.

A cikin makon da ya gabata kaɗai, kotun laifukan hanya ta samu nasarar hukunta kimanin masu karya dokokin hanya 270 a faɗin jihar.

Aminu Dalhatu/Gusau