Shugabannin siyasar Enugu sun bayyana goyon bayansu ga Tinubu a 2027

Wasu manyan shugabannin siyasa daga jihar Enugu sun bayyana cikakken goyon bayansu ga sake zaɓen Shugaba Bola Ahmed Tinubu a zaɓen 2027.

Shugabannin, ƙarƙashin jagorancin gwamnan jihar Peter Mbah, sun bayyana hakan ne yayin wata ganawa da shugaban ƙasa a fadar shugaban ƙasa da ke Abuja.

A yayin ganawar, Shugaba Tinubu ya gode wa shugabannin bisa goyon bayan da suka nuna masa, yana mai cewa sauye-sauyen tattalin arzikin gwamnatinsa sun fara haifar da ci gaba a fannoni kamar lafiya da ilimi da ababen more rayuwa.

Ya kuma yaba wa gwamna Mbah bisa yadda yake tafiyar da harkokin tsaro da ci gaban jihar Enugu, yana mai jaddada cewa gwamnatinsa za ta ci gaba da aiki tare da jihar domin samar da ci gaba mai ɗorewa.

A nasa jawabin, gwamna Peter Mbah ya ce sun je Abuja ne domin nuna godiya ga shugaban ƙasa bisa tallafin da gwamnatin tarayya ke bai wa jihar Enugu, tare da tabbatar da cewa al’ummar jihar za su mara masa baya a zaɓen 2027.

Tsohon shugaban majalisar dattawa, Ken Nnamani, ya ce ci gaban da ake gani a Enugu ya samu ne sakamakon haɗin kai tsakanin gwamnatin jihar da ta tarayya, yana mai tabbatar da cewa jihar za ta goyi bayan Tinubu a wa’adi na biyu.

Bello Wakili/Abuja