Mataimakin Sakataren APC na Kasa ya bayyana aniyarsa ta takarar Sanatan Nasarawa ta Yamma

Mataimakin Sakataren Jam’iyyar APC na ƙasa, Farfesa Abdulkareem Abubakar Kana, ya bayyana aniyarsa ta tsayawa takarar kujerar Sanatan Nasarawa ta Yamma a zaɓen 2027.

Farfesa Kana ya sanar da haka ne a Lafiya, inda ya jagoranci magoya bayansa zuwa sakatariyar APC ta jihar domin sanar da shugabannin jam’iyyar burinsa.

Ya ce ya yanke shawarar tsayawa takarar ne bayan tattaunawa da masu ruwa da tsaki daga ƙananan hukumomin Keffi da Karu da Kokona da Nasarawa da kuma Toto.

Kana ya ce burinsa ba na kansa ba ne, illa amsa kiran al’umma domin samar da wakilci nagari a majalisar dattawa.

Har ila yau, ya yabawa gwamnan jihar, Abdullahi Sule, bisa goyon bayan da ya nuna wa Sanata Ahmed Aliyu Wadada a matsayin wanda yake so ya gaje shi a 2027, yana mai alƙawarin yin aiki domin tabbatar da nasarar sa.

A nasa ɓangaren, shugaban APC na jihar Nasarawa, Dakta Aliyu Bello, ya yabawa Farfesa Kana bisa bin tsarin jam’iyya wajen bayyana aniyarsa, tare da buƙatar ya gudanar da yaƙin neman zaɓe cikin kwanciyar hankali da nuna ƙwarewa.

Aliyu Muraki/Lafiya