Shugaba Tinubu Ya Mika Sakon Ta’aziyya ga Iyalan Tsohon Shugaban INEC Attahiru Jega

Daga Bello Wakili

Shugaba Bola Ahmed Tinubu, ya miƙa sakon ta’aziyyarsa ga Farfesa Attahiru Jega, Mai Bai wa Shugaban Ƙasa Shawara na Musamman kan Bunƙasa Harkokin Kiwo, bisa rasuwar matarsa, Hajiya Hadiza Jega.

A cikin wata sanarwa da Mai Bai wa Shugaban Ƙasa Shawara kan Yaɗa Labarai, Bayo Onanuga ya fitar, ya ce Shugaban  ya bayyana marigayiyar Hadiza Jega a matsayin mace jajirtatta, wacce ta kasance ginshiƙi ga mijinta a tsawon shekarunsa na hidimtawa kasa.

Mataimakin Shugaban Ƙasa, Kashim Shettima, ne ya wakilci Shugaban Ƙasa yayin Sallar jana’izar marigayiyar da aka gudanar a babban masallacin Juma’a da ke Abuja, inda ya isar da saƙon ta’aziyyar Shugaban Ƙasar ga Farfesa Jega da iyalansa.

Tinubu ya kuma yaba da gudunmawar marigayiyar Hadiza Jega ga ilimi da ci gaban al’umma, yana mai jaddada irin tasirin alherinta ga jama’a.

Ya yi addu’ar Allah Ya jikanta da rahama, tare fatan bai wa iyalanta haƙuri da juriyar wannan babban rashi.