Gwamna Bago Ya Halarci Hawan Durbar Tare da Sarkin Kagara

Daga Aliyu Lawal

Majalisar Masarautar Kagara ta gudanar da  hawan Durbar domin bikin kammala azumin watan Ramadan na wannan shekara tare da nuna goyon baya ga Gwamna Mohammed Umar Bago.

Sarkin Kagara, Alhaji Ahmed Garba Gunna Attahiru II, tare da hakiman masarautarsa sun hau Dawakai domin jagorantar wani gagarumin jerin gwano da ya kayatarwa a manyan titunan garin.

Gwamna Mohammed Umar Bago, wanda ya nuna farin ciki matuka bisa irin tarbar da jama’a suka yi masa, ya shiga cikin jerin gwanon.

Yayin hawan, an gudanar da al’adu daban-daban wadanda sua kara armashi ga bikin Durbar, wanda a baya aka dakatar da shi sakamakon yawaitar hare-haren ‘yan ta’adda a yankin masarautar.

Hawan Durbar na shekarar 2026 a Masarautar Kagara, ya nuna irin zaman lafiyar da aka samu a yankin.

Wasu mazauna Kagara sun bayyana jin dadinsu tare da godiya ga Gwamnan bisa kokarinsa na kare rayuka da dukiyoyi, sannan suka yi addu’ar dorewar zaman lafiya ba kawai a masarautar ba har ma da jihar da kasa baki daya.