Shugaba Tinubu Ya Nada Ambasada Isma’il Abba Yusuf Shugaban NAHCON

Daga Bello Wakili 

Shugaban Ƙasa Bola Tinubu ya naɗa Ambasada Ismail Abba Yusuf a matsayin sabon Shugaba Hukumar Alhazai ta Ƙasa (NAHCON).

Naɗin yana jiran amincewar Majalisar Dattawa, bisa tanadin sashe na 3(2) na Dokar NAHCON ta shekarar 2006.

Shugaba Tinubu ya aike da wasiƙa a yau Laraba 11 ga watan Fabrairun 2026 ga Shugaban Majalisar Dattawa, Godswill Akpabio, yana neman a gaggauta tabbatar da naɗin Ambasada Yusuf domin maye gurbin Farfesa Abdullahi Usman, wanda ya yi murabus a wannan mako bayan kusan watanni 14 yana kan muƙamin.

Ambasada Yusuf ƙwararren jami’in diflomasiyya ne, wanda ya taɓa zama Jakadan Najeriya na Musamman a Jamhuriyar Türkiya daga shekarar 2021 zuwa 2024.