Hajjin 2026: An Nada Sarkin Dutse Amirul Hajj na Jihar Jigawa

Daga Usman Muhammad Zaria

Gwamna Umar ya  naɗa Sarkin Dutse, Alhaji Hamim Muhammadu Sanusi a matsayin Amirul Hajj na jihar domin gudanar da aikin Hajjin shekarar 2026.

Jami’in Hulɗa da Jama’a na Hukumar Jin Dadin Alhazai ta  jihar Alhaji Habibu Yusuf Adamu ne ya bayyana hakan ga Rediyon Najeriya a hedikwatar hukumar da ke Dutse.

Ya ce an naɗa Sarkin a matsayin Amirul Hajj kuma jagoran tawagar gwamnati tare da wasu mambobi huɗu domin gudanar da aikin Hajjin 2026 a ƙasa mai tsarki.

Habibu ya ce mambobin huɗun sun haɗa da Kachallan Dutse, Alhaji Kabiru Ali, Malam Umaru Nassarawa, Babban Limamin Masallacin Juma’a na Kazaure, Imam Salisu Abubakar, da kuma wakilin Sarkin Gumel.

Jami’in ya ƙara da cewa, dukkan naɗe-naɗen sun fara aiki nan take.