Jihar Jigawa Ta Gudanar Da Addu’o’i Na Musamman Ga Marigayi Muhammadu Buhari

Majalisar Dokokin jihar Jigawa ta gudanar da addu’oi na musamman ga tsohon shugaban kasa Muhammadu Buhari wanda aka yi jana’izar sa a mahaifar sa dake garin Daura na jihar Katsina.

An gudanar da addu’oin ne a lokacin zaman majalisar na Laraba bisa umarnin Shugaban majalisar, Alhaji Haruna Aliyu Dangyatin.

Wakilin mazabar Maigatari, Alhaji Habu Muhammad, Wanda ya jagoranci gabatar da addu’oin ya yi addu’ar Allah Madaukakin Sarki ya gafartawa marigayi tsohon shugaban kasa Muhammadu Buhari Ya Kuma yafe masa kurakurensa, tare da fatan Aljanna ta zamto makomar sa.

Alhaji Habu Muhammad Wanda ya bayyana rasuwar a matsayin babban rashi ga Najeriya, ya yi addu’ar Allah Ya baiwa al’ummar jihar Katsina da Kuma iyalansa, da ma kasa baki daya hakurin jure wannan babban rashi.

Usman Mohammed Zaria