Gwamna Dauda Lawal Ya Nada Amirul Hajj Bana

Gwamna Dauda Lawal ya amince da nadin Amirul Hajj karkashin wani kwamiti don sa ido kan ayyukan Hukumar Alhazai ta Jiha a Saudiyya don tabbatar da bin ka’idojin gida da na Saudiyya gaba daya a duk lokacin gudanar da aikin Hajjin 2025.

Sakataren gwamnatin jihar, Malam Abubakar Mohammad Nakwada ne ya sanar da hakan a wata sanarwa da babban mai taimaka masa na musamman kan harkokin yada labarai Sulaiman Ahmad Tudu ya raba wa manema labarai, ya ce kwamitin zai fara aiki cikin gaggawa.

A cewar sanarwar, mambobin kwamitin sune mai martaba Sarkin Maradun a matsayin shugaban tawagar yayin da Alhaji Habibu Balarabe aka nada a matsayin Sakatare.

Sauran wakilan sune Sulaiman Adamu Gummi, Bello Isah Almufty, Murtala Adamu Jangebe, Abubakar Bello Furfuri Alh Rabi’u Ilili Bakura, Malam Ibrahim Izala, Malama Sadiya Mahe da Malama da Hadiza Muhd ​​Gummi.

Gwamna Lawal ya dora wa kwamitin alhakin kula da ayyukan hukumar alhazai ta jiha da kuma tabbatar da samun nasara da jin dadin alhazan Zamfara baki daya a duk lokacin gudanar da aikin Hajjin 2025.

COV/AMINU DALHATU.