Ana Binciken Zargin Rashin Biyan Wani Sarki Mai Shekaru 101 Albashi A Jihar Kwara

Gwamnatin jihar Kwara ta ce ta fara gudanar da bincike kan zargin rashin biyan albashi da wasu kudade na tsawon shekaru 21 ga wani basaraken gargajiya na Jebba mai shekaru 101 a karamar hukumar Moro ta jihar, Oba Abdulkadir Alabi Adebara.

Da yake zantawa da manema labarai yayin taron manema labarai da ma’aikatar sadarwa da dabaru ta jihar ta shirya a Ilorin, kwamishinan kananan hukumomi da al’amuran masarautu na jihar, Abubakar Bata, ya ce gwamnatin jihar ce ke binciken lamarin.

Ya ce gwamnatin jihar tana kan gaba a kan batun masarautar Jebba da nufin samar da mafita mai dorewa a kan lamarin.

Basaraken, wanda gwamnatin Alhaji Mohammed Lawal ta daga darajjar Sarkin zuwa mai darajja ta 3 a shekaru 20 da suka gabata (16 ga Mayu, 2003), sai dai gwamnatocin da suka biyo baya sun rage masa darajarsa.

A wani labari na daban kwamishiniyar ilimi da ci gaban bil’adama ta jihar, Hajiya Sa’adatu Modibbo Kawu, ta ce gwamnatin jihar ta biya naira miliyan dubu 7 a matsayin nata kaso domin bunkasa ilimi a jihar.

Ta ce ayyukan da gwamnatin jihar ke yi a fannin bunkasa ilimi da horar da malamai ya janyo raguwar rashin zuwa makaranta da kashi hamsin cikin dari a jihar.

A nata jawabin kwamishiniyar ci gaban al’umma ta jihar, Afolashade Kemi, ta ce gwamnati ta kwashe mabarata daga birnin Ilorin.

Kwamishinar ta bayyana cewa an kwashe su cikin shekara guda da ta gabata wanda a lokacin samamen anyi zargin cewa mafi akasarin mabaratan an same su da muggan makamai kamar bindigu da wukake da laya da sauran muggan makamai.

COV/ALI MUHAMMAD RABIU/Wababe