Ma’aikatan Ceto Na Cigaba Da Neman Jirgin Shugaban Kasar Iran Da Ya Bace

Da yammacin yau lahadi ne tarin ma’aikatan ceto suka bazama wajen aiki gano jirgi mai saukar ungulu dauke da shugaba Ebrahim Raïsi na Iran, wanda wani “hatsari” ya rutsa da shi, kamar yadda jami’ai da kafafen yada labaran kasar suka sanar.

An kaddamar da bincike don gano jirgin mai saukar ungulu amma ya yi wuya saboda “yanayi  mara kyau”, ciki har da hazo, in ji ministan cikin gida Ahmed Vahidi a gidan talabijin na kasar.

Jirgin na shugaba Raïsi na daya daga cikin  ayarin jirage masu saukar ungulu uku dauke da tawagar shugaban kasar.

“Zai iya ɗaukar lokaci kafin a isa yankin da wannan jirgi ya fadi ,” in ji ministan cikin gida Ahmed Vahidi, kodayake wannan wurin zai kasance a cikin dajin Dizmar, kusa da garin Varzaghan.

Ebrahim Raïssi ya ziyarci lardin gabashin Azarbaijan a yau lahadi, inda ya kaddamar da wata madatsar ruwa tare da shugaban kasar Azarbaijan Ilham Aliev a kan iyakar kasashen biyu.

Raïssi, mai shekaru 63 , ya kasance shugaban Jamhuriyar Iran tun watan Yunin 2021.