An Raba Kayan Agaji Tare da Sake Fasalin Albashin Dagattai a Kauru

Majalisar Karamar Hukumar Kauru dake Jihar Kaduna ta raba kashi na 2 na kayayyakin tallafin abinci da suka kunshi buhunan masara da shinkafa 600 kowannensu, a kokarin da gwamnati ke yi na rage wahalhalun da jama’a ke fama da shi sakamakon cire tallafin mai.

Da yake mika ragamar rabon kayayyakin ga Shugabannin kwamitin, wadanda sune zababbun gundumomi 11, Shugaban Karamar Hukumar, Alh Bashir Tanko Dawaki, Ya umurcesu su yi adalci kana su tabbatar kayayyakin sun isa ga mabukata da Marayu da masu lalurar nakasa da gajiyayyun dake gundumomin.

Shugaban Karamar Hukumar Kauru Alhaji Bashir Tanko Dawaki.

Alh Bashir Dawaki ya yabawa Gwamna Uba Sani na tallafin abincin da nufin rage wahalhalun da talakawan yankin ke fuskanta.

Alh Hamisu Umar

Da yake tsokaci a madadin shugabannin kwamitin wadanda suka karbi tallafin gundumomin su, kakakin majalisar kansilolin, Alh Hamisu Umar ya nuna farin cikinsa ga gwamnatin jihar bisa wannan yunkuri, ya sha alwashin zasu raba kayayyakin yadda ya dace

A wata sabuwa kuma, shugaban Karamar Hukumar Alh Bashir Dawaki, Ya sanarda karin albashi ga Dagatai dake daukacin masarautu uku dake fadin karamar hukumar Kauru.

• Gwamnatina Ta Gaji Bashin $587m Da N85bn – Gwamna Uba Sani

Jami’in yada labarai na Karamar Hukumar, Alh Sani Yahaya, ya furta cewa kodayake shugaban bai fadi yawan karin da aka yi ba, sai dai hakan ya zama wajibi domin karfafa musu gwiwar gudanarda ayyukansu a matsayinsu na jagororin wanzar da zaman lafiya da tabbatarda hadin kai.

Bashir Dawaki ya yabawa Dagatai wadanda su ke kusa da al’uma a matakin farko bisa gudunmuwarsu na cigaban yankin, ya bukacesu su kara himma ta hanyar taimakawa jami’an tsaro wajen kawarda miyagun ayyuka a tsakanin al’uma.

Ya kuma gargadi masu hakar ma’adinai ba bisa ka’ida ba a yankin, su nemi iznin gwamnati kafin aikata hakan ko kuma su fuskanci hukunci.

LR: Dagacen Garin Kagadama sai Kuma Wakilin Raya Kasan Kauru Alh Yusuf Muhammad.

A jawabin Dagacen Garin Kagadama dake gundumar Kauru Alh Umar Kasimu ya nuna jin dadinsa bisa wannan yunkuri ya yi alkawarin cigaba da zage damtse wajen tabbatarda zaman lafiya a yankunansu

Yusuf Zubairu Kauru