UNICEF Ta Ƙaddamar Da Shirin Koyar Da ’Yan Mata Sana’o’i A Katsina

Daga Isma’il Adamu, Katsina

Asusun Tallafawa Yara na Majalisar Ɗinkin Duniya, UNICEF, tare da haɗin gwiwar Hukumar Ilimin Firamare ta Jihar Katsina, SUBEB, sun ƙaddamar da shirin Skills4Girls, wata sana’o’I domin yara mata da nufin bai wa ’yan mata matasa 35,000 a jihar Katsina dabarun sana’o’in dogaro da kai da kuma kasuwanci.

Shirin, wanda ake gwajinsa a Najeriya a jihar Katsina kaɗai, an ƙaddamar da shi ne ta hanyar wani taron haɗin gwiwar tsara shirin da ya samu halartar ’yan mata matasa daga ƙananan hukumomin Katsina, Funtua, Kaita da Dutsi.

Da take jawabi a wajen taron, ƙwararriyar UNICEF kan bunƙasa matasa, Ngozi Izuora-Songu, ta ce an tsara shirin ne domin tabbatar da cewa ’yan mata sun samu ƙwarewar da za ta amfani rayuwarsu fiye da abin da suke koya a aji, tare da ba su damar bayar da gudunmawa mai kyau ga al’ummominsu.

Ta ce babban manufar shirin ita ce tabbatar da cewa ’yan matan sun samu ƙwarewar da za ta taimaka musu wajen samun abin dogaro da kai da kuma bayar da gagarumar gudunmawa ga al’umma.

A cewarta, shirin zai mayar da hankali ne kan gina ƙwarewa a fannoni uku, waɗanda suka haɗa da ƙwarewar samun aikin yi, kasuwanci da kuma iya samar da abubuwan amfani da kuma mayar da wani ɓangare na abin da aka samu ga al’umma.

Izuora-Songu ta bayyana cewa, yayin da wasu shirye-shirye kamar Girls Education Project (GEP) da REACH suka mayar da hankali, a wani ɓangare, kan ci gaba da karatu da kammala makaranta, shirin Skills4Girls zai gina ne bisa nasarorin da aka samu daga waɗannan shirye-shirye, tare da ƙara ba ’yan mata damar dogaro da kansu ta fuskar tattalin arziki.

Ta ce ana gudanar da tantance ƙwarewar ’yan matan ne domin gano bambance-bambancen da ke tsakaninsu da kuma irin baiwar da kowannensu yake da ita.

Ta ƙara da cewa ba sa son dogaro da zato wajen tsara shirin, inda za a kuma gudanar da taron haɗin gwiwar tsara shirin tare da ’yan matan domin jin ra’ayoyinsu game da irin sana’o’i da kasuwancin da suke son koyon su ko shiga.

A cewarta, hakan zai taimaka wajen tsara shirin da zai dace da buƙatunsu da kuma yanayin muhallin da suke rayuwa.

Izuora-Songu ta bayyana cewa shirin zai gudana daga shekarar 2026 zuwa 2029, kuma ana sa ran zai amfani ’yan mata 35,000 masu shekaru tsakanin 10 zuwa 19 a ƙananan hukumomin Katsina, Funtua, Kaita da Dutsi.

Ta kuma ce ’yan mata masu lalura ta musamman za su samu damar shiga shirin domin tabbatar da cewa kowa ya samu dama ta bai ɗaya wajen koyon ƙwarewar da za ta taimaka masa a rayuwa.

Bugu da ƙari, shirin zai kuma shigar da samari da matasa maza 7,500, da kuma iyaye, masu ba da shawara, masu horarwa da shugabannin al’umma 5,000, abin da zai kai jimillar waɗanda za su amfana da horon zuwa 47,500.

A nasa jawabin, Shugaban Hukumar Ilimin Firamare ta Jihar Katsina, Dakta Kabir Gafia, ya ce hukumar za ta taka rawar da ya kamata wajen tabbatar da nasarar shirin.

Dakta Gafia ya ce gwamnatin Jihar Katsina ta yi matuƙar maraba da shirin, saboda manufofinsa sun yi daidai da ajandar gwamnatin jihar mai taken “Building Your Future”, wato gina makomar ku.

Ya ce gwamnatin jihar ta kasance tana koyar da matasa da ’yan mata sana’o’i daban-daban domin su samu damar dogaro da kansu.

Ya lissafa wasu daga cikin sana’o’in da shirin zai mayar da hankali a kansu, da suka haɗa da sarrafay man shafawa da sabulu da sabulun wanke-wanke da turare, da kuma ɗinki, saka, gyaran wayoyin hannu da na’urorin lantarki, da kuma fasahar sadarwa da kwamfuta (ICT), da sauransu.

Dakta Gafia ya buƙaci ’yan mata matasa da sauran waɗanda shirin ya shafa da su yi cikakken amfani da damar da shirin ya samar domin inganta rayuwarsu da makomarsu.

Fassara: Shafii Abubakar Wababe