Yaƙi da Daba: Gwamnatin Kano Ta Fara Shirin Horas da Matasa Dubu Ɗaya

Daga Khadijah Aliyu 

Gwamnatin Jihar Kano ta kammala shirye-shiryen horas da matasa dubu ɗaya kan dabarun inganta rayuwa da sana’o’in dogaro da kai domin bunƙasa rayuwarsu da ci gaban al’umma.

Kwamishinan Yaɗa Labarai da Harkokin Cikin Gida na jihar, Ibrahim Waiya ne ya bayyana hakan yayin wata ziyarar aiki da ya kai Cibiyar Tsaro ta Jihar Kano da ke Gabasawa.

A cewarsa, shirin ya shafi matasan da suka rungumi tsarin Safe Corridor wanda gwamnatin jihar ta ƙaddamar a baya a matsayin wani ɓangare na ƙoƙarin  inganta makomar matasa.

Ibrahim Waiya ya ce gwamnatin jihar Kano na ci gaba da jajircewa wajen yaƙi da daba da kuma dakile rikice-rikicen siyasa a faɗin jihar.

Ya bayyana cewa an ware kusan naira miliyan 600 domin aiwatar da shirye-shiryen ƙarfafa matasa, inganta zaman lafiya da tabbatar da daidaiton zamantakewa.

A nasa jawabin, Sarkin Kano, Muhammadu Sanusi II wanda Sarkin Shanun Kano, Shehu Muhammad ya wakilta, ya yaba wa gwamnatin jihar bisa ƙoƙarinta na inganta zaman lafiya da haɗin kai a jihar Kano.

Shi ma da yake jawabi yayin ziyarar, fitaccen ɗan kasuwar Kano, Alhaji Sabi’u Bako, ya yabawa gwamnati bisa bada fifiko a ci gaban matasa, yana mai cewa shirin zai taimaka wajen rage rashin zaman lafiyar matasa da ƙarfafa zaman lafiya a tsakanin al’umma.

Ya kuma yi alƙawarin haɗa kan ‘yan kasuwar Kano domin tallafa wa shirin, don tabbatar da dorewar zaman lafiya da ci gaba.

Wakilan Hukumar Yaƙi da Sha da Fataucin Miyagun Ƙwayoyi ta Ƙasa da sauran masu ruwa da tsaki sun halarci ziyarar.