Majalisar Dattawa Ta Tabbatar da Nadin Sabbin Ministoci Biyu

Daga Bashir Meyere 

Majalisar Dattawa ta tabbatar da nadin ministoci biyu da Shugaban Ƙasa ya miƙa sunayensu domin tantance su a matsayin ministoci.

Mutanen biyu su ne Joseph Tegbe daga Jihar Oyo da kuma Ambasada Sola Enikanolaiye daga Jihar Kogi, waɗanda aka tabbatar da su a matsayin ministoci a gwamnatin tarayya.

Hakan ya biyo bayan tantance su da aka  a zaman majalisar, inda Sanatoci suka yi musu tambayoyi kan muhimman batutuwa da suka shafi bangaren wutar lantarki da harkokin ƙasashen waje, waɗanda su ne ma’aikatun da za su jagoranta.

Ana sa ran ministocin biyu za su cike gurbin da ya biyo bayan murabus ɗin wasu tsofaffin ministoci.

Shugaban Majalisar Dattawa, Godswill Akpabio, ya tunatar da Mista Joseph Tegbe cewa har yanzu aikin samar da wutar lantarki bai kai matsayin da ‘yan Najeriya ke bukata ba, tare da bukatar ya yi amfani da gogewarsa wajen sauya wannan yanayi.

Da suke amsa tambayoyin ‘yan majalisa, Mista Joseph Tegbe da Ambasada Sola Enikanolaiye sun jaddada cewa za su tabbatar da amincewar da Shugaban Ƙasa, Bola Tinubu, ya nuna musu, tare da alkawarin yin aiki tare da Majalisar Dattawa domin sauke nauyin da ke kansu.