Hukumar Alhazai Ta Jihar Kaduna Ta Sanar Da Wa’adin Biyan Kafin Alkalami Na Shekarar 2026

Hukumar Jin Dadin Alhazai ta Jihar Kaduna ta yi kira ga Maniyyata Aikin Hajjin 2026 da su biya kafin alkalami nan da ranar 14 ga watan Nuwamban 2025.

Jami’in Hulda da Jama’a na Hukumar Ibrahim Datti ne ya sanar da hakan a wata sanarwa da aka fitar ranar Laraba 22 ga watan Oktoban 2025.

Hukumar wacce ta ce kudin kama kujerar kar su gaza Naira Miliyan Biyu, ta ce Hukumar Alhazai ta Kasa NAHCON, na kokarin sama wa Maniyyata rangwame bisa kudin kujera da ta sanar a baya.

Ta kara da cewa duk wanda bai biya ba kafin karshen wa’adin da ta bayar, ba zai sami kujerar Aikin Hajjin Bana ba.

Har ila yau Hukumar ta ce Maniyyata za su iya yin rajista a ofisoshinta da ke sakatariyar Kananan Hukumomi 23 na Jihar Kaduna, ko kuma hedikwatar hukumar a kan titin Katsina, da ke cikin garin Kaduna.

Hukumar ta kuma ja kunnen Maniyyata da su guji yin mu’amala da duk wanda ba ma’aikacinta ba, tare da gujewa bai wa kowa kudadesu a hannu.

Rel/Safiyah Abdulkadir