Kudirin Kasafin Kudi Na Shekarar 2025 A Jihar Jigawa Ya Samu Amincewar Majalisar Dokokin Jihar

Majalisar Dokokin Jihar Jigawa ta amince da kudurin kasafin kudin shekara ta 2025 na sama da naira miliyan dubu 698.

Haka kuma majalissar ta amince da kasafin kudin kananan hukumomin jihar 27, na naira miliyan dubu 184 da miliyan 491.

Daukar wannan mataki ya biyo bayan gabatarwa da kuma amincewa da rahoton kwamatin kasafin kudi na majalisar ya yi.

Da ya ke gabatar da rahotonsa, shugaban kwamitin kuma wakilin mazabar Malam Madori Alhaji Hamza Hamza Adamu Ibrahim, ya ce dukkan kwamitocin Majalisar sun tantance kiyasin kasafin kudaden ma’aikatu da hukumomin gwamnatin jihar, domin samar da karin kudade ko kuma daidaito kan abubuwan da ke kunshe cikin kasafin kudin.

A cewar sa, baya da ganawa da masu ruwa da tsaki kwamitocin sun ji ta bakin kungiyoyin kyautata jin dadin al’umma daban daban, tare da zama na musamman da dukkan kwamitocin Majalisar a lokaci daya, domin gudanar da gyare gyare da cimma matsaya dan samar da cikakken daftarin kasafin kudi da kwamatin zai mikawa majalisar kamar yadda aka dora masa nauyin wannan aiki.

Bayan samun goyon baya da gagarumin rinjaye sai shugaban majalisar dokokin jihar Jigawa, Alhaji Haruna Aliyu Dangyatin ya sanar da amincewa da kudurin kiyasin kasafin kudin na sabuwar shekara ta 2025 ya zamo doka.

Usman Mohammed Zaria