‘Yan Bindiga Sun Shiga Hannu Yayin Bai Wa Sojoji Cin Hanci A Taraba

Rundunar Sojin Najeriya a jihar Taraba ta ce dakarunta sun kame wasu ’yan bindiga da suka yi musu tayin cin hancin Naira miliyan biyu.

Mataimakin daraktan hulda da jama’a na Runduna ta Shida da ke Jalingo, Laftanar Oni Olubodunde ne ya sanar da kama wadanda ake zargin a kauyukan Chinkai da kuma Sarkin Kudu da ke kananan hukumomin Wukari da Ibbi a jihar.

Ya ce, sojojin sun yi nasarar cafke wasu ’yan ta’adda da suka nemi bayar da cin hancin Naira miliyan biyu domin a sake su.

Ya ce, sojojin sun ki amincewa su karbi cin hancin daga matasan hudu masu shekaru 2o zuwa 28.

Laftanar Oni, ya kara da  cewa wadanda ake zargin suna cikin jerin wadanda aka jima ana nema ruwa a jallo saboda hannu kan garkuwa da mutane a Wukari da kewaye.

Babban Birget na 6, Birgediya Kingsley Chidebere Uwa, ya yaba wa sojojin saboda jajircewarsu  wajen bin doka da  oda.

Ya ce, jajircewarsu ce ta kai ga nasarar da aka samu.