Dangote Ya Karya Farashin Man Dizel

Matatar man Aliko Dangote ta sanar da ƙara rage farashin man dizel zuwa naira 1,000 kan kowacce lita.

A cikin wata Sanarwa da kamfanin ya Fitar ranan Talata ya ce ana sa ran ”rage farashin man dizel ɗin zai yi tasiri sosai a dukkan ɓangarorin tattalin arziki da kuma rage hauhawar farashin kayayyaki a Nijeriya.”

A watan Janairu ne matatar man Dangote ta fara samar da man dizel da na jiragen sama.

Tun daga lokacin matatar take sayar da man dizel a kan farashi mai rahusa na Naira 1,200 a kowace lita, kimanin kashi 30 cikin 100 na ragin farashin kasuwa da ya kai kusan Naira 1,600 kan kowace lita.

Kamfanin ya ɗaura ɗamarar fara samar da tataccen man fetur tare da samun ƙarin ganga miliyan ɗaya na ɗanyen man da Kamfanin Mai na Nijeriya (NNPC Ltd) ya kawo.

A farkon watan ne kamfanin ya fara fitar da albarkatun man fetur ga kasuwannin cikin gida.