Tinubu Ya Gargadi ’Yan Siyasa Kan Tashin Hankali Gabanin Zaɓen 2027

Daga Bello Wakili 

Shugaban Ƙasa Bola Ahmed Tinubu ya gargaɗi ’yan siyasa da magoya bayansu kan guje wa tashin hankali, yayin da harkokin siyasa ke ƙamari gabanin babban zaɓen shekarar 2027.

A cikin wata sanarwa, Shugaban Ƙasar ya yi Allah-wadai da rahotannin tashin hankali a wasu tarukan siyasa a sassa daban-daban na ƙasar, yana mai jaddada cewa babu gurbin tashin hankali a harkokin yaƙin neman zaɓe a tsarin dimokuraɗiyya.

Ya buƙaci jam’iyyun siyasa da magoya bayansu da su mayar da hankali kan manufofi da shirye-shiryen da za su inganta rayuwar al’umma da ci gaban ƙasa.

Shugaba Tinubu ya sake jaddada ƙudurinsa na tabbatar da gudanar da zaɓe cikin lumana, ’yanci da adalci, tare da kira ga shugabannin siyasa da su nuna haƙuri da ɗaukar nauyi.

Ya bayyana cewa bambancin ra’ayin siyasa da burin neman mulki bai kamata su mayar da ’yan Najeriya maƙiya ga juna ba.

Shugaban Ƙasar ya kuma umarci hukumomin tsaro da su ɗauki matakan da suka dace wajen tunkarar duk masu ƙoƙarin kawo cikas ga zaman lafiyar al’umma.

Ya tabbatar wa jam’iyyun siyasa da ‘yan takara da cewa za a samar musu da isasshen tsaro domin gudanar da yaƙin neman zaɓe cikin ‘yanci a kowane yanki na ƙasar ba tare da tsoratarwa ba.

Sai dai Tinubu ya yi gargaɗin cewa gwamnatinsa ba za ta lamunci halayen rashin ɗa’a daga ‘yan siyasa da magoya bayansu ba, inda ya umarci hukumomin tsaro da su tunkari masu tada zaune tsaye da sauran ayyukan da suka saɓa wa dimokuraɗiyya.

Fassara: Safiyah Abdulkadir