Hukumomin Bada Agajin Gaggawa Sun Bada Horo Kan Aikin Ceto A Karamar Hukumar Auyo

Hukumar Ba da Agajin Gaggawa ta Jihar Jigawa (SEMA) tare da haɗin gwiwar Hukumar Ba da Agajin Gaggawa ta Ƙasa (NEMA) da Asusun Kula da Kananan Yara na Majalisar Dinkin Duniya UNICEF sun shirya horar da aikin ceto yayin ambaliya,  a Ƙaramar Hukumar Auyo.

Taron horaswar ya haɗa masu ruwa da tsaki daga hukumomi daban-daban, inda aka bai wa mahalarta ƙwarewa da ilimin da ya dace domin samun nasarar ceto da kuma kai dauki ga al’ummomin da ambaliya ta shafa.

A yayin horon, an gudanar da darussa kan dabarun bincike da ceto, bayar da taimakon farko, da hanyoyin kwashe jama’a daga wuraren da ambaliya ta shafa.

Wannan shiri ya nuna jajircewar SEMA, NEMA, da UNICEF wajen horar da al’umma yadda za su kai dauki yayin ambaliya, da bada agajin gaggawa.

A jawabin sa, Jami’in kungiyar ba da agajin ta Red Cross, Ali Yohanna, ya yaba wa SEMA, da NEMA, da UNICEF da kuma Sarakuna bisa halartar horon da zai taimaka wajen ceton jama’ar da ke buƙatar kulawar gaggawa.

Usman Muhammad Zaria