An Gano Gawarwakin ‘Yan Cirani 27 Bayan Kifewar Jirgin Ruwa A Tekun Tunisia

Jami’an da ke tsaron gabar tekun Tunisia sun tsamo gawarwakin ‘ƴan cirani 27 bayan nutsewar jirgin ruwan da suke ciki, a lokacin da suke ƙoƙarin ƙetara Tekun Meditareniya don tsallakawa Turai, sannan suka samu nasarar ceto mutane 87 da ransu.

A cewar babban jami’in da ke kula da gabar tekun, Zied Sdiri, sun gano gawarwakin ‘ƴan ciranin da lamarin ya rutsa da su ne a tsibirin Kerkennah, kuma sun fito ne daga yankin yammacin Sahara.

Sdiri ya ce an  garzaya da  mutane 15 daga cikin wadanda suka ceto zuwa asibiti, duk da dai bayyi ƙarin bayani kan hakan ba.

Wani jami’in rundunar da ya nemi a sakaya sunansa, ya shaidawa Kamfanin Dillancin Labaran Faransa AFP cewa, ‘ƴan ciranin su 110 sun yi ƙoƙarin yin amfani da ƙananan jiragen ruwan don silalewa cikin daren Talata su tsallaka Turai.

‘Yan cirani daga Afrika dai na amfani da Tunisia da kuma makwabciyarta Libya don tsallakawa Turai, duk kuwa da hatsarin da hakan ke da shi.

RFI