Gwamnatin Jihar Kano Za Ta Kashe Naira Biliyan 3 Wajen Gina Azuzuwa A Makarantu

Gwamnatin Jihar Kano ta bayyana shirin  ta na kashe sama da Naira biliyan 3 wajen gina sabbin azuzuwa a fadin kananan hukumomin jihar 44.

Gwamna Abba Kabir Yusuf ya bayyana haka a yayin taron masu ruwa da tsaki da aka gudanar a gidan gwamnati dake Kano.

Ya ce gwamnati na da burin samar da yanayi mai kyau na koyo da koyarwa ta hanyar gina karin ajujuwa da gyara wadanda suka lalace.

Gwamnan ya bayyana cewa za a dauki sama da jami’an tsaro 17,000 aiki a fadin jihar domin tabbatar da tsaron kayayyakin makarantun firamare, inda za a tura mutum 400 a kowace karamar hukuma.

“Za a dauki masu gadi a yankunan da suke domin aiki a makarantun firamare da nufin tabbatar da ganin an kare makarantun yadda yakamata“.

Gwamna Abba Kabir Yusuf ya ci gaba da cewa kowace karamar hukuma za ta samu Naira miliyan 25 domin gyara azuzuwa, inda hukumar kula da ilimin bai daya ta kasa za ta sa ido kan aikin domin tabbatar da ingancisa.

Ya kara da cewa zuba jarin ya nuna kudirin gwamnati na inganta ababen more rayuwa da samar da ingantaccen ilimi  ga dalibai.

Abdullahi Jalaluddeen