Jigawa Ta Amince Da Naira Miliyan 570 Don Inganta Abinci Mai Gina Jiki

Daga Usman Muhammad Zaria 

Majalisar Zartarwa ta Jihar Jigawa ta amince da ware naira miliyan 570 a matsayin tallafin haɗin gwiwa domin sayen muhimman kayan magani da abinci mai gina jiki ta hannun UNICEF, don yaƙi da matsanancin ƙarancin abinci mai gina jiki a tsakanin yara.

Kwamishinan Yaɗa Labarai na jihar, Alhaji Sagir Musa Ahmed ne ya bayyana hakan bayan taron majalisar zartarwar da aka gudanar a gidan gwamnati da ke Dutse.

Ya ce an ware naira miliyan 300 domin sayen abinci na musamman da ake amfani da shi wajen magance  tamowa (RUTF), da kuma madarar magani ta musamman nau’in F75 da F100 domin kula da yaran da ke fama da matsananciyar tamowa.

Ya ƙara da cewa, an ware naira miliyan 270 domin sayen sinadaran ƙarin gina jiki (Multiple Micronutrient Supplements), don magance ƙarancin muhimman sinadarai a jiki da inganta lafiyar al’umma masu rauni.

Kwamishinan ya bayyana cewa, wannan mataki ya biyo bayan samun nasarar kula da yara 15,957 daga cikin 18,122 da aka karɓa a cibiyoyin kula da masu fama da matsananciyar tamowa ba tare da kwantar da su a asibiti ba a faɗin jihar a shekarar 2025, wanda ya kai kashi 88.1 cikin 100.

Ya danganta nasarar da zuba jari mai ɗorewa a shirye-shiryen inganta abinci mai gina jiki, ingantattun hanyoyin jinya da haɗin gwiwa tsakanin gwamnatin jihar, UNICEF da sauran ƙungiyoyin ci gaba.

Sagir Musa Ahmed ya ce kuɗaɗen za su tabbatar da ci gaba da samun muhimman kayan abinci na musamman, da kuma faɗaɗa damar samun maganin ceton rayuka ga yara masu rauni a ƙananan hukumomi 27 na jihar.

Fassara: Safiyah Abdulkadir