Majalisar Dokokin Kano Ta Amince da Kudirin Kafa ’Yan Sandan Jiha

Daga Khadijah Aliyu

Majalisar Dokokin Jihar Kano ta amince da wani kudiri da ke neman yin gyara ga Kundin Tsarin Mulkin Tarayyar Najeriya na shekarar 1999, domin samar da damar kafa rundunar ’yan sandan jiha.

An amince da kudirin ne a zaman majalisar da Kakakinta, Jibril Ismail-Falgore, ya jagoranta.

Shugaban majalisar ya ce ’yan majalisar sun yi nazari tare da amincewa da kudirin bayan tattauna sassa na ɗaya zuwa na 26 a zaman  majalisar.

Ya bayyana cewa amincewa da kudirin ya yi daidai da ikon da sashe na 9(2) na Kundin Tsarin Mulkin Najeriya na shekarar 1999 ya bai wa majalisar.

Kudirin na neman yin gyara ga kundin tsarin mulkin domin samar da tsarin doka da zai ba da damar kafa rundunar ’yan sandan jiha, tare da tanade-tanaden da suka shafi hakan.

KHADIJAH ALIYU