Gwamnan Zamfara Na Karbar Bakuncin Gwamnonin PDP

Gwamna Dauda Lawal na karbar bakuncin gwamnonin da aka zaba a karkashin jam’iyyar PDP don wani muhimmin taro a jihar Zamfara.

Wata sanarwa da mai magana da yawun gwamnan, Sulaiman Bala Idris ya fitar ta nuna cewa a yau Juma’a ne ake sa ran gwamnonin za su isa Gusau gabanin taron da aka shirya yi a ranar Asabar.

A cewar sanarwar, kungiyar gwamnonin PDP za ta yi amfani da taron ne domin tattaunawa kan batutuwan da suka shafi siyasa, karfafa hadin kan jam’iyya, da kuma lalubo hanyoyin samar da ci gaba na hadin gwiwa a jihohinsu.

Gwamna Dauda Lawal ne zai shirya wa gwamnonin da suka ziyarce liyafar cin abincin dare, yayin da za a yi zaman sirri a gobe.

Sanarwar ta kuma kara da cewa, gwamnonin za su kuma magance muhimman batutuwan da suka shafi shirye-shiryen taron jam’iyyar na kasa da aka shirya gudanarwa a Ibadan, babban birnin jihar Oyo, a ranakun 15 da 16 ga watan Nuwamba, 2025.

REL/AMINU DALHATU