Gwamna Dauda Lawal Zai Halarci Babban Taron Majalisar Ɗinkin Duniya A New York

Daga Aminu Dalhatu, Gusau

Gwamnan Jihar Zamfara, Dauda Lawal, zai halarci zama na 81 na Babban Taron Majalisar Ɗinkin Duniya da za a gudanar a birnin New York, inda zai gana da shugabannin ƙasashe, abokan hulɗar ci gaba da ƙungiyoyin ƙasa da ƙasa, domin jawo hannun jari da ƙarfafa haɗin gwiwa da jihar.

Mai magana da yawun gwamnan, Sulaiman Bala Idris, ne ya bayyana hakan a cikin wata sanarwa, inda ya ce halartar Gwamna Lawal zai ba shi damar gabatar da muhimman abubuwan da jihar ta sanya a gaba wajen ci gaba, tare da neman haɗin gwiwa a fannonin tsaro, bunƙasar tattalin arziki, ilimi, kiwon lafiya da kuma ci gaba mai ɗorewa.

A cewar sanarwar, taken zama na 81 na Babban Taron Majalisar Ɗinkin Duniya shi ne: “Maido da Amana da Gudanar da Sauyi A Majalisar Ɗinkin Duniya Mai Aiwatar da Ayyukan da Za Su Amfanar da Kowa.”

Sanarwar ta bayyana cewa ayyukan Gwamna Lawal za su fara ne a ranar 18 ga watan Satumba, tare da halartar babban taron tattaunawa na shugabannin zartarwa na duniya da kuma zaman SDG Moment.

Fassara: Shafii Abubakar Wababe