Kyari Ya Yi Alkawarin Ci Gaba

Dan takarar kujerar wakilan tarayya mai neman wakiltar ƙananan hukumomin Mobbar da Abadam da Guzamala da Kukawa a Jihar Borno, Mohammed Abba Kyari, ya yi alkawarin samar da ingantacciyar wakilci idan aka zaɓe shi.

Ya bayyana hakan ne bayan karɓar fom dinsa a hedikwatar jam’iyyar ADC da ke Abuja, inda ya nuna kwarin gwiwar samun nasara.

Mohammed Abba Kyari ya ce ya shiga takarar ne domin kawo ci gaba da shugabanci nagari tare da magance matsalolin tsaro da ilimi da lafiya da tallafa wa matasa da bunƙasa ababen more rayuwa.

Ya kuma yi alƙawarin yin aiki tare da masu ruwa da tsaki da mata da matasa domin tabbatar da an wakilci muradun al’umma yadda ya kamata a majalisar wakilai.

Bashir Mayere/Abuja